قصيدة ( بح )
تأليف / متولي بصل
قرَّب علينا العيد
ليه يا ابني مش فرحان
قاعد تقول وتزيد
وتشكي م الحرمان
نفسك في لبس جديد
تفرح به زي زمان
بطَّل يا واد تنكيد
هو انت إيه عريان
نفسك في مصروف إيد
للصحبه والخِلَّان
تتعشَّى وتبات سعيد
وتحس إنك كيان
فاكرني قلبي حديد
فاكرني يا ابني شيطان
ولا فاكرني بخيل
بخلي عليك إحسان
خايف عليك يا ابني
لو زاد معاك المال
في يوم تغلِّبني
وتمشي ف طريق بطَّال
سيبني يا واد أبني
واعلِّي في البنيان
ولمَّا تورثني
وجيبك يبات مليان
هتيجي تشكرني
وتقول لي علِّي كمان
خد مني واحرمني
جوَّعني واظلمني
***************
يا واد لا تتعبني !
ولا يوم تراجعني
أنا ريس المركب
يا واد أنا القبطان
أنا اللي احدد وأقول
إذا كنا نمشي يمين
والا هنمشي شمال
وانت عليك تسمع
يا واد لازم تسمع
وتقول حاضر في الحال
والا عايزهم يقولوا
باسمع كلام العيال
يا ابا
يا ابا يا ابا
حاسس كأني يتيم
وانا بابكي زي الحريم
ده انا كنت شاب مستقيم
ماشي في الطريق السليم
لا عمري لفيت سيجارة
ولا عمري بصيت لجارة
ولا توب لبسته الا توبي
ولا بعمل الدين ستارة
راضي بحياتي وعيشتي
بس اللي تاعبني خيبتي
من قسوة امي حبيبتي
وابويا اللي حارمني
يا ابا
يا ابا يا ابا
حاسس كأني يتيم
وانا بابكي زي الحريم
خدني يا ابويا في حضنك
حسسني لحظة اني إبنك !
دي الدنيا حواليا نار
والعيشة زي الهباب
الشهد طعمه مرار
وانا باسف التراب
مع كل طلِّة نهار
ألقى الشقى والعذاب
حتى اللي فاكره عمار
طلع النهارده خراب !
يا ابا يا ابا يا ابا
هيفيد بإيه البُنا
لما يضيع الضنا
ويفيد بإيه الغِنى
إن فات أوان الهَنا ؟!
يا ابا الفلوس دي ورق
عشانها ليه نتحرق ؟!
أخويا هج وغرق
وانا عمري كله انسرق !
انا يا با عمري انسرق !
العمر عدَّى وفات
وانا ع الترب ما داريش
نايم مع الأموات
تايه مع الدراويش
مش لاقي حلم جميل
إلا رغيف العيش !
حتى ان صحيت م النوم
ما قادرش أصلا أقوم !
العمر عدَّى خلاص
والحلم بَحْ ما فيش !
